Jukwaa la wapenzi wa mambo ya muziki wa Tanzania-

Breaking

Monday, February 22, 2010

Historia fupi ya muziki wa dansi

Ukitaka kuongea muziki wa dansi uliingiaje nchini ni muhimu kujua historia ya mji wa Tanga. Tanga ndipo muziki wa dansi ulipoingilia nchini. Wajerumani waliusambaratisha mji wa Tanga kwa mizinga kati mwaka 1888 na 89. Na baada ya hapo kuujenga upya kwa kufuata mpangilio uliosababisha Tanga kuwa na mitaa maarufu kama barabara ya kwanza ya pili na kuendelea. Wajerumani walianzisha shule ya kwanza ya serikali Tanga 1892 na hapohapo wakanzisha bendi ya shule ya kwanza, pamoja na kuwa Wajerumani hawakutawala muda mrefu baada ya hapo lakini Waingereza waliiendeleza sana bendi hiyo iliyokuwa ikipiga aina mbalimbali za muziki wa kigeni. Dansi ilianza kwanza kama klabu ambapo watu walialikana kuja kucheza aina mbalimbali za muziki wa kizungu mtindo maarufu unaojulikana kama ballroom dancing. Aina hizi za klabu zilianzia Mombasa na kuingia nchini kupitia Tanga na kisha kuletwa Dar Es Salaam na klab iliyokuwa maarufu Tanga iliyoitwa Tanga Young Comrades Club, klabu nyingine ilianzishwa ikaitwa New Generation Club ambayo ilianzisha matawi miji mbalimbali. Klabu hizi ndizo zilizozaa bendi za dansi. Inaonekana Dar Es Salaam ndio ilikuwa ya kwanza kuwa na bendi yake African Association Jazz Band, ambapo wanamuziki wengine waliihama na kuanzisha Dar Es Salaam Jazz Band, hiki kilikuwa kipindi kati ya miaka 1930 na 1940, kwenye 1950 kulikuwa na bendi maarufu Bagamoyo iliyoitwa Lucky Star jazz band ambayo ilikuwa na urafiki na Dar Jazz. Baada ya hapo kulianza bendi ambazo wanamuziki na wanachama wake walipatikana kutokana na wanakotoka, kulikuweko na Ulanga Jazz band ya Wapogolo, Rufiji Jazz Band iliyoanzishwa na Wandengeleko, Western Jazz iliyoanzishwa kwanza na Wanyamwezi. Bendi zote hizi baadae zilikuja kuwa na wanachama mchanganyiko bila kujali uzawa. Na kulikuweko na Skokian Jazz Band hii ilikuwa ni bendi na klabu ya watu mchanganyiko. Mwaka 1958 wanamuziki kutoka Kilwa walianzisha Kilwa Jazz Band wanamuziki hawa walitoka bendi iliyoitwa Tanganyika Jazz. Ilipofika 1966 bendi ilikuwa na wanamuziki takribani 26, 15 wakiwa Kilwa A na 11 Kilwa B. Zamani bendi zilikuwa na mtindo wa kuwa na bendi B ambayo ni ya Vijana. Patrick Balisdya aliwahi kuwa Dar Jazz B. Kilwa Jazz ilikuwa na wanachama kama 50 wengine wakiwa viongozi wa juu serikalini. Waliolipa ada ya uanachama na hivyo kuweza kuingia madansi ya bendi bila kulipa. Wakati huo makao makuu ya Kilwa Jazz yalikuwa katika ukumbi ambao kwa sasa unaitwa Kwa Madobi maeneo yaa Jangwani…itaendelea.

6 comments:

Mzee wa Changamoto said...

Heshima kwako Uncle Kitime.
Nashukuru kwa historia hii ya Muziki wa Dansi nchini.
Ntaendelea kuifuatilia katika "toleo lijalo" kujua vipi tumefika hapa tulipo.
Kisha tutajiuliza kama MUZIKI WETU UNAKUA AMA LA??!!!

Anonymous said...

Bwana kitime tunashindwa kukuelewa kwanini hufatilii habari huyu mzee Hamis kitambi ambae inasemekana leo hii amerudishwa muhimbili akiwa taabani. tunaomba hebu kuwa kama Ankal mwananajamii.
Mdau
UK

John F Kitime said...

Utanisamehe kama naonekana sifuatilii wakati huu niko kwenye tour ya muziki Marekani, nimejaribu kuwasiliana na jamaa zangu nyumbani wafuatilie, hakuna la zaidi ninaloweza kufanya nikiwa huku ugenini

Anonymous said...

John!
Huyo Anoy hapo chini anatuzingua.Anataka wewe useme nini kuhusu Bwana Kitambi wewe kama wewe? haya unayoyafanya niyamaana zaidi na yanayomhusu kitambi ni ZIADA tu. Yaonekana yeye anajua mengi kuhusu Kitambi wa hamisi ndio maana anajua kwamba hata leo yuko hospitali. Kwakuwa yeye yuko dar afuatilie na atueleze mengi anayojua asituharibie jamvi.

Anonymous said...

Mkuu,

Lindi au Masasi kulikuwa na ile Bendi ilyopiga Jangu Mariana, ilikuwa inaitwaje?

John F Kitime said...

Bendi ile bahati mbaya ilirekodi mara moja tu, ilikuwa muziki wa kipekee wenye hadhi asili ya kwao. Recording ilifanywa live nje kwenye ukumbi wa dansi wa polisi Lindi. Bendi ilikuwa inaitwa Mitonga Jazz

Adbox